അമ്പലപ്പാറ
ഗ്രാമ പഞ്ചായത്ത്

അമ്പലപ്പാറ: ചിങ്ങപ്പുലരിയിൽ നാടും നഗരവും പൂത്തുലയാൻ അമ്പലപ്പാറ ഒരുങ്ങുന്നു. വരാനിരിക്കുന്ന ഓണാഘോഷങ്ങൾക്ക് മുന്നോടിയായി ഗ്രാമപഞ്ചായത്തിന്റെയും കൃഷിഭവന്റെയും സംയുക്ത ആഭിമുഖ്യത്തിൽ നടപ്പിലാക്കുന്ന ചെണ്ടുമല്ലി തൈകളുടെ വിതരണോദ്ഘാടനം ഇന്ന് (10/06/2026) കാലത്ത് 11 മണിക്ക് ഗ്രാമപഞ്ചായത്ത് പ്രസിഡണ്ട് കെ. രാധാകൃഷ്ണൻ മാസ്റ്റര്‍ നിര്‍വ്വഹിച്ചു✂️. ഓണത്തിന് സ്വന്തം മണ്ണിൽ വിരിഞ്ഞ പൂക്കൾ കൊണ്ട് മുറ്റമൊരുക്കാൻ ജനങ്ങളെ പ്രാപ്തരാക്കുക എന്ന ലക്ഷ്യത്തോടെയാണ് പഞ്ചായത്ത് ഈ പദ്ധതി വിഭാവനം ചെയ്തിരിക്കുന്നത്.🏡✨

കേവലം 'ഒരു രൂപ' നിരക്കിലാണ് ഗുണമേന്മയുള്ള ചെണ്ടുമല്ലി തൈകൾ കർഷകർക്കും പൊതുജനങ്ങൾക്കുമായി വിതരണം ചെയ്തത്. കുറഞ്ഞ ചിലവിൽ ജനങ്ങളിലേക്ക് പദ്ധതി എത്തിക്കാൻ കഴിഞ്ഞത് വലിയ നേട്ടമായി.🪙

കൃഷിഭവൻ പരിസരത്ത് നടന്ന ചടങ്ങിൽ ഗ്രാമപഞ്ചായത്ത് വൈസ് പ്രസിഡന്റ് സൗദ സലീം അധ്യക്ഷത വഹിച്ചു. വികസന സ്റ്റാൻഡിങ് കമ്മിറ്റി ചെയർമാൻ കെ.ടി ഷെമീര്‍ ചടങ്ങിൽ പങ്കെടുത്തവർക്ക് സ്വാഗതം ആശംസിച്ചു. അമ്പലപ്പാറയെ പുഷ്പകൃഷിയിൽ സ്വയംപര്യാപ്തമാക്കുകയാണ് ഈ ലക്ഷ്യത്തിലൂടെയെന്ന് ജനപ്രതിനിധികൾ ചടങ്ങിൽ വ്യക്തമാക്കി.

ചടങ്ങിന് കൃഷി ഓഫീസർ രുക്സാന ഷാജുദീൻ നന്ദി രേഖപ്പെടുത്തി. വാർഡ് മെമ്പർമാർ, കർഷക പ്രതിനിധികൾ, കൃഷി വകുപ്പ് ഉദ്യോഗസ്ഥർ, പൊതുജനങ്ങൾ തുടങ്ങി നിരവധി പേർ ചടങ്ങിൽ പങ്കെടുത്തു.